15. 1. 2016: Днесь зачінать святкованя Дня Русинів у Сербії

Подля інформацій аґентуры Рутенпрес днесь зачінають у Сербії святкованя Дня Русинів, котрый быв про Сербію схваленый на 17-ый януар.

День Русинів Сербії є встановленый на 17-ый януар із нагоды припоминаня собі дня, коли у 1751-ім роцї радця Марії Терезії і адміністратор Кралёвско-державного Бачского діштрікту в Зомборї Франц Йозей де Редл підписав першый урядный документ – Контракт о переселїню 200 русиньскых ґрекокатолицькых родин зо Земпліна до тогдышнёго Великого Керестура. Тот день бере ся за день заселёваня Русинами тых теріторій. Датум Дня Русинів Сербії прияв ся у 2007-ім роцї і першыраз святковав ся у 2008-ім роцї.

Днесь, 15-го януара, зачінать святкованя у Суботіцї, Шідї, так само в Коцурї і в Новім Садї. В суботу будуть святковати у Вербасї а в недїлю, коли буде точный датум Дня Русинів, святкованя буде проходити у Дюрдёві, Ґосподінцях, Новім Орахові і Бікічу. Свято закінчіть ся в понеділок, 18-го януара, в Руськім Керестурї в просторах Дому културы.

П. М.